Xəbər Lenti

İnfoqrafika

Arxiv

Yazar


Aqil Mehdi

04 May

2013
1835
Bizə yedirdilən 10 qəpiklər

Son günlərin ən aktual mövzularından biri şəhərdaxili nəqliyyatda gediş haqqının artırılması məsələsidir. Artıq bir aya yaxındır Taarif Şurasına ardıcıl edilən müraciətlər, keçirilən iclaslar barədə də məlumatlısınız. Nəqliyyat nazirimiz Ziya Məmmədov israrla gediş haqqının qaldırılmasına tərəfdardır. İsrar sözünü ona görə yazdım ki, Taarif Şurası bir neçə dəfə qiymət artımının olmayacağı barədə açıqlama versə də, Nazirlik israrlı müraciətlərindən əl çəkmir.

Yəqin ki, xatırlayırsınız, əvvəlki qiymət artımında hörmətli nazirimiz Ziya müəllim nə demişdi. O qiymət artımına özünəməxsus izah vermişdi. Onun açıqlamasının qısa məzmunu təxminən belə idi: qiymət artımına getməyə məcburuq, yeni avtobuslar alınıb, təzə dayanacaqlar quraşdırılıb, intellektual sistem yaradılıb.

İndi də diqqət yönəldək görək bu artımdan kim nə qazandı. Sərnişinlərin qazandığını mən sayım: avtobus qəzaları artdı, ölümlər çoxaldı, 100-lə sürülən avtobuslarda bəlkə də 100 il yaşamaq arzusunda olan insanlarımızın ödü ağzına gəlib infarkt oldular, dayanacaqları da insanların dədə-baba avtobusa mindikləri yerdə yox, ürəkləri istəyən yerdə, nataraz vəziyyətdə qoydular. İntellektual sistemdən isə danışmağa dəyməz. Açılışından bir ildən də çox vaxt keçən bu sistem, hələ də avtobusların nə vaxt dayanacağa yaxınlaşacağını göstərə bilmir. Təsəvvür edin ki, dayanacaqdakı monitorda avtobusun 25 dəqiqədən gələcəyini göstərir, amma budur e, bir də gördün avtobus dayandı. Və ya 10 ildir mindiyin avtobusun nə vaxt gələcəyini bilmək istəyirsən, məlum olur ki, monitorda sənin minmək istədiyin marşrutun adı yoxdur. Bu bizim qazandıqlarımızdır. Qarşı tərəfin qazandıqları barədə isə heç bir iddiam yoxdur. Sadəcə onu bilirəm ki, Bakı şəhərindəki marşrutlarda 2000-ə yaxın avtobus işləyir. Onların hər birində gündəlik planı orta hesabla 100 AZN-dən hesablayın.

İndi isə qiymət artımına baxaq. Bu gün nəqliyyat nazirinin müavini Musa Pənahov açıqlamasında bildirib ki, gediş haqqı 30 qəpikdən baha olmayacaq. Yəqin ki, bu 10 qəpiklik artımda da xalqı nəzərə alıblar. Ona görə çox artıma getməyiblər. Niyə də getsinlər axı, elə on-on qaldırsalar yaxşıdır. Belədə hiss olunmur, adam öyrəşir.

Bilirsiniz bu nəyə oxşayır? Bilmirsinizsə deyim:

Bir gün kəndin cayılları oturub söhbət edirlər. Kişilikdən, söz deməkdən dəm vururlar. Aralarında ən sısqa olanı qəfildən, “mən gedib Fərmana əclaf deyə bilərəm” söyləyir. Hərə başlayır bir yandan buna gülməyə. Gülüşə səbəb isə o olur ki, Fərman kəndin adlı-sanlı qoçularından imiş. Amma bu balaca inadından dönmür, sadəcə 1 ay vaxt istəyir. Hamı mərcləşir. On nəfər bir yana olur, bu bala sısqa da bir yana. Sabah tezdən düzəlir yola və gəlib çatır Fərmanın evinin yanına. Oturub gözləyir, Fərman yola çıxan kimi onun qabağından keçə-keçə başlayır “ə”, “ə”, “ə” deməyə. Bu əməlini dayanmadan 6 gün təkrarlayır. Növbəti 6 gündə isə başlayır “əc”, “əc”, “əc” deməyə. Növbəti 6 günü “əcl”, “əcl”, “əcl” söyləyir. Gələn dəfə “əcla”, “əcla”, “əcla” deyir. Ayın son 6 gününü isə “əclaf”, “əclaf”, “əclaf” deyib işini başa vurur. Kəndin cayılları ay tamamında gəlirlər balacanın yanına ki, buyur, hünərini göstər. Gəlirlər Fərmanın evinin qənşərinə. O da eləmə tənbəllik, başlayır tində dayanmış Fərmanın qabağından o yana gedir, bu yana gedir və “əclaf”, - deyir, mərci də udur.

Gözləyin, növbə Tağı Əhmədovundur. O da açıqlama verərək, yaxın illərdə 8 stansiya tikəcəklərini deyib. Nəylə tikəcəklər, cibindən verəsi deyil ki? Gedişhaqqı 25 qəpik olsun, biz də bir qədər kömək edək. Zarafat deyil, rayona gedəsi olsaq, cəmi 25 qəpiyə “Qaraçuxur”dan minib, “Avtovağzal”da düşəcəyik. Heç bilirsiniz, əlinizdə bir çantanız olsa, bu yolu taksi sizi 15 manatdan ucuza aparmaz. Bir qədər insaflı olun, 5 qəpik nədir ki? Onsuz da hiss etməyəcəyik, ödəniş kartladır, 5 qəpik davası olmayacaq.

Bölmənin digər xəbərləri


® 2009 FAKTXEBER.COM - Onlayn Xəbər Portalı

Dərc olunan materialların mətninə görə, redaksiya heç bir məsuliyət daşımır.
Saytdakı materiallardan istifadə edərkən istinad zəruridir.


24-06-2018 20:19



  (+994 70) 870-47-49       (+994 55) 786-96-84

  [email protected]

Valyuta.com