Artıq bir ay ərzində doğma şəhərimiz olan Bakıda bir-birinin ardınca bir neçə yanğın hadisələri baş verib. Hadisələrə ötəri baxsaq bunun adi bir yanğınlar olduğunu düşünmək olar. Yox, əgər yanğınları araşdırmalı olsaq, onda xeyli məsələlər ortaya çıxır. Misal üçün, ilk fikirləşdiyimiz variant budur ki, ölkəmizi istəməyən, inkişafımızı götürə bilməyən (əgər varsa) və ən əsası, çiçəklənən paytaxt Bakının böyüməsinə mane olan qüvvələr vardır. Elə həmin qüvvələr istər yerli olsun, istərsə də xarici bu yanğın hadisələrini törədir. Lökbatandakı hərbi baza ilə başlayan, Heydər Əliyev Mərkəzi ilə davam edən və Luna Park ətrafında alovlanan yanğın hadisələri Bakı şəhərinin yanmasına səbəb olur. Bir tərəfdən isti havalar, o biri tərəfdən də yanğın hadisələri onsuz da bişməkdə olan həm şəhərimizi, həm də sakinlərimizi həyəcanda saxlayır. Hamı düşünür ki, görən bu gün Bakının hansı tərəfi barədə yanğın xəbərini alacaqlar. Bu hadisələrdə təqdirəlayiq hal mövcuddur ki, o da Fövqəladə Hallar Nazirliyinin əməkdaşlarının yanğınlara vaxtında müdaxilə etməsidir. FHN əməkdaşlarının helikopter və ya yanğınsöndürən maşınlarla yanğınları vaxtında zərərsizləşdirməsi sakinlərdə bir qədər rahat nəfəs almağa stimul yaradır.

Maraqlıdır ki, müqəddəs Ramazan ayında yanğın hadislərinin baş verməsini günah etməklə də əlaqələndirmək olar. Mümkündür ki, yanğınların baş verməsində səbəb heç bir xarici və ya daxili qüvvələr deyil, məhz günahların edilməsidir. Ramazan sözünün ərəb dilindən hərfi tərcüməsindən biri də məhz "yandıran" mənasını verir. Elə bu səbəbdən paytaxt Bakının hər gün çoxlu günah etməsi və ya günaha məcbur edilməsi onun sonda yanması ilə nəticələnir. Bəlkə də çoxları üçün bu variant gülünc görsənsə də, şəhərimizin oruc tutmaması variantını səsləndirmək istəyirəm. Təklif edirəm ki, şəhərimiz oruc tutsun, günahlardan uzaq düşsün, bəlkə yanğınlar bu yolla ondan əl çəkmiş olar. Hər-halda bu ideya müstəqil yazarın fikri idi və tənqidləri bu məzmunda qəbul etməyə hazıram.