MSK-da fevralın 9-da keçirilən növbədənkənar parlament seçkiləri ilə bağlı iclas keçirilir. İclasda MSK-ya daxil olan müracitlərlə bağlı qərar qəbul ediləcək.

Mərkəzi Seçki Komissiyasının (MSK) fəaliyyəti göz qabağındadır, tam qanunidir və bizim heç kimdən çəkinəcəyimiz yoxdur.

Bu barədə Mərkəzi Seçki Komissiyasının (MSK) sədri Məzahir Pənahov bu gün keçirilən iclasda deyib. O bildirib ki, əgər qanun pozuntusu olsaydı, beynəlxalq təşkilatlar dünyaya car çəkərdilər.

M.Pənahovun sözlərinə görə, ola bilsin ki, kimlərsə bu və ya digər məqsədlərlə təxribat xarakterli addımlar atsın: “Biz bunu nəzərə almalıyıq və diqqətli olmalıyıq”.

İclasda bildirilib ki, 82 saylı Ağcabədi, 94 saylı Bərdə kənd, 56 saylı Xaçmaz kənd, 106 saylı Tovuz-Qazax-Ağstafa seçki dairələri üzrə müraciətlər araşdırılması üçün müvafiq dairə seçki komissiyalarına göndərilib.

Xatırladaq ki, MSK-nın sonuncu dəfə fevralın 13-də keçirilmiş iclasında, ümumilikdə 4 dairədə keçirilmiş seçkinin nəticələrinin ləğv edilməsi ilə bağlı qərar qəbul edilib.