FaktXeber.com-un “Voltairenet.org” saytına istinadən verdiyi məlumata görə, Amerika hökuməti digər ölkələrdə çevriliş etmək və baş verəcək müharibə üçün ictimai fikri formalaşdırmaq üçün yeni və tam məxfi əməliyyat briqadası yaradıb. Saytın yazdığına görə, Amerika Viyetnam, Əfqanıstan və İraqda birbaşa apardığı müharibədən sonra bu kimi əməliyyatların ölkəsi üçün nə qədər ağır başa gəldiyini anlayıb. Odur ki, Obama hökuməti qərara alıb ki, bu kimi əməliyyatların əvəzinə digər ölkələrə müdaxilə etmək üçün hərbi-kəşfiyyat mütəxəssisləri hazırlayaraq göndərsin.

Hazırda MKİ və Pentaqonun nəzdində olan “Müdafiə-Kəşfiyyat Agentliyi” (Defense İntelligence Agensy) birgə Vircinya ştatında yerləşən bazaların birində bu mütəxəssiləri hazırlamaqla məşğuldur. Artıq 16500 nəfərdən ibarət olan mütəxəssislərin təlimləri başa çatmaqdadır. Yaxın gələcəkdə onlar müxtəlif adlarla, o cümlədən ABŞ səfirliklərini qorumaq, biznesmen, universitet işçisi, icraçı direktor və digər sahələr üzrə mütəxəssis kimi müəyyən ölkələrə göndəriləcək.

ABŞ hökuməti Liviyada məhz bu mütəxəssislərdən yararlanmışdır. Hazırda isə Suriyada onlardan istifadə olunmaqdadır. Qeyd etmək lazımdır ki, sözügedən briqada hərbi və terror əməliyyatları mütəxəssisləri olmaqla yanaşı, casusluq, “yumuşaq inqilab”, qeyri-ənənəvi müharibə üzrə ixtisaslaşdırılıblar.