Türkiyənin 8-ci prezidenti Turqut Özalın baş müşaviri, keçmiş hakim Arif Yüksəl, "zəhərlənmə müddəti səfərə çıxmazdan bir ay əvvəl başladı. Onu zamana yayaraq zəhərlədilər", - deyib.

FaktXeber.com-un verdiyi məlumata görə, Arif Yüksəl mövzuyla əlaqədar əhəmiyyətli açıqlamalar səsləndirib. Yüksəl, Özalın limonaddan zəhərləndiyi yönündəki iddiaların diqqəti məqsəddən yayındırmağa hesablandığını söyləyib.
Özalın 4 aprel 1993-cü ildə başda Azərbaycan olmaqla türkdilli ölkələrə 12 günlük səfərə çıxmazdan əvvəl xəstələndiyini söyləyən Yüksəl baş verənləri bu cür izah edir: "Səfərdən əvvəl Özalın vəziyyətində bəzi dəyişikliklər gördüm. Rəhmətliyin yanına gedərək, "əfəndim, yaxşı görünmürsünüz. Bu səfəri ləğv edin", - dedim. Cavab olaraq, "doğru söyləyirsən, həqiqətən narahatam. Üzərimdə fərqli bir ağırlıq var. Siz Vulkana (xüsusi mətbuat katibi Vulkan Bozkır) söyləyin, Semra xanıma məsələni çatdırsın, bu səfəri ləğv edək", - dedi. Mən Vulkana səfərin ləğv ediləcəyini söylədim. Vulkan isə bu barədə, yəni səfərin ləğvini Semra xanıma söyləyib. Semra xanım da "mən lazımlı tədbirləri görmüşəm. Səfərə gedəcəkləri müəyyənləşdirmişəm. Buna görə də səfərin ləğvi müzakirə mövzusu deyil", - söyləyib. Daha sonra rəhmətlik mənə, "Arif, biz bu səfəri ləğv etməyəcəyik, gedəcəyik", - dedi. Mən də əlacsız qaldım."

Səfərdən qayıtdıqda Özalı aeroportda qarşılayan Yüksəl, prezidentin üzünün təyyarədən enərkən qıpqırmızı olduğu söyləyir. Özalın elə həmin gün saat 18-dəki sərginin açılışına qatıldığını deyən Yüksəl, bir ara Özalı binada gəzərkən əlində limonadla gördüyünü, bir qurtum içdikdən sonra kənara qoyduğunu vurğulayır. Amma ətrafındakılardan heç kimin əlində limonad stəkanı yox imiş. Dövlət başçısının sonradan xəstələndiyini bildirən Yüksəl, köynəyinin düymələrini açdığını və pencəyini çıxardaraq bir divana uzandığını deyir. Yüksəl sözlərini belə davam edir: "Birlikdə istirahət otağına gəldik. Onu rahatlayandan sonra Semra xanımın yanına getdim. Semra xanım orada qadınlarla danışırdı. İçəri girmədim, xəbər göndərdim. Prezidenti istirahət otağına apardığımı, vəziyyətinin yaxşı olmadığını söylədim. Semra xanım, "Arif, sən hər şeyi şişirdirsən. Sən evinə get. Mən maraqlanaram", - dedi."

Özalın səhərisi gün ölməsi barədə danışan Yüksəl, Əhməd Özal atasının nəşini yuyarkən, "Prezidentin ölümü şübhəlidir. Qəti şəkildə zəhərlənib. Necə olursa olsun, yarılmalıdır", - deyə qışqırdım. Ancaq Özal ailəsi meyitin yarılmasını istəmədiklərini söyləyərək, buna ehtiyac olmadığını dedilər. O zaman yarılsaydı, qəti şəkildə söyləyirəm, 99 faiz zəhərləndiyi ortaya çıxacaqdı", - deyir.