FaktXeber.com olaraq AXCP-Müsavat birləşməsi barədə məlumat vermişdik. Bu birlik deyəsən digər partiyaları da düşünməyə vadar edib. Belə ki, müxalifət partiyaları arasında gizli sövdələşmələrin aparıldığı xəbəri mətbuata sızandan sonra Azərbaycan Demokrat Partiyasının (ADP) yeni seçki bloku yaratmaq planları üzə çıxıb. Məlumatda bildirilir ki, ADP ilə Ümid Partiyası birləşməyi və bu birliyə digər qüvvələri cəlb etməyi qərara alıblar.

Mövzu ilə əlaqədar suallarımızı cavablandıran ADP-nin sədr müavini Həsrət Rüstəmov bizimlə söhbətində bildirdi: “Yeni seçki bloku yaratmaqla bağlı partiyanın mövqeyi hələ dəyişilməyib. Bu ilin əvvəlindən, hətta seçki ili başlamamış biz müxalifətin geniş koalisiya yaradacağı fikirdə idik. Bu mənada müxalifətin narazı elektoratı bir yerdə birləşməlidir. Onları seçkiyə gətirmək və müxalifət namizədə səs vermək üçün müxalifətin böyük koalisiyaya ehtiyacı var. Ancaq bu istiqamətdə cəhdlər göstərmişik. Onu da deyim ki, göstərilən səylərin müsbət nəticələri olmayıb. Buna baxmayaraq, bizim fikrimiz dəyişməz qalır”.

H.Rüstəmov hesab edir ki, müxalifətin geniş koalisiyası olmayacağı təqdirdə seçki məntəqələrində seçicilər düzgün namizədi seçmək üçün yenə də çətinliklər çəkəcək: “Çünki, bir iqtidar namizədi ilə yanaşı bir neçə müxalifət namizədi olacaq və bunlardan hansını seçmək asan olmayacaq. Bu baxımdan bir neçə seçki bloku ilə çoxpartiya şəkilində seçkiyə getməkdə o qədər də ciddi fərq görmürük. Ancaq buna baxmayaraq böyük birliyin alınmaması şəraitində - indiki şəraitdə müxalifətin bir neçə blokla seçkiyə qatılmasına pis də baxmırıq. Ona görə də hazırda bu məsələ müzakirə mövzusudur. Müxtəlif tərəflərdən təkliflər gəlir. O cümlədən AXCP ilə Müsavatın yeni yaratdıqları birliklə əlaqədar bəzi təkliflər var. Eyni zamanda Ümid və başqa partiyalar da öz təkliflərini veriblər. Ümumi olaraq təkliflər müzakirə olunur. Amma hələ qəti qərar verməmişik ki, hansı partiyalar ilə blok yaradacağıq”.

Partiya rəhbərliyində də bu istiqamətdə yekdil qərarı yoxdur – H.Rüstəmov vurğuladı: “Bəziləri hesab edirlər ki, ALP və VİP-lə seçkiyə getmək lazımdır. Bəziləri AXCP-Müsavat birliyinə qoşulmağı düzgün hesab edir. Başqaları isə Ümid Partiyası ilə blok yaratmağı real addım kimi qeyd edirlər. Konkret fikir olmadığı üçün qəti söz demək istəmirəm. Amma bu variantlardan birini mütləq seçəcəyik. Çünki, seçkilərə blok şəkilində getməyə meyilliyik”.

H.Rüstəmov özlərinə daha uyğun olanı da deməkdən çəkinmədi: “Mənim fikrimə görə bizə daha uyğun ALP və VİP ilə seçkilərə getməkdir. Eyni zamanda başqa bir neçə partiyanın əlavə ola biləcəyi də mümkündür”.

Əli Mövlud