Bir müddət idi ki, daxili gərginlik yaşanırdı. AXCP-nin Rəyasət Heyətinin son qərarından sonra faktiki olaraq, blokun mövcudluğu mümkün deyil – bu sözləri Vətəndaş və İnkişaf Partiyasının sədri Əli Əliyev “Azadlıq” blokunun fəaliyyətinə xitam verilməsi ilə əlaqədar açıqlama verərkən FaktXeber.com-a dedi: “Biz bu bloku bir yerdə təsis etmişdik. Keçən dövrdə çox böyük siyasi yol keçmişik. Bu mənada AXCP blokdan gedirsə, blokun fəaliyyəti mənəvi baxımdan düzgün deyil. Məqsədimiz budur ki, Azərbaycan Liberal Partiyası (ALP) ilə bir yerdə olaq. Bunu reallaşdırmaq üçün ilk olaraq seçki bloku yaradacağıq. Çox sevindirici haldır ki, ALP kimi mərd müttəfiq qazanmışıq. İlk növbədə bu münasibətlərə layiqli fəaliyyət göstərmək vəzifəmizdir”.

“Azadlıq” blokunun dağılma səbəbini Ə.Əliyev belə şərh etdi: “Kənardan bunu istəyənlərin sayı çox idi. Açıq  şəkildə hakimiyyət və Müsavat Partiyası bu blokun dağılmasını istəyirdi. Onu da deyim ki, blokun dağılmasına ancaq öz qərarlarımız təsir göstərə bilərdi. Bizim yerimizə bunu heç kəs edə bilməzdi. Heç kəsin istəyi və mövqeyi həlledici rol oynamayıb”.

AXCP “Azadlıq” blokunda təmsil olunan partiyaları real güc hesab etməyib Müsavatla birləşmək qərarına gəldi, deyə bilərikmi – sualına müsahibimiz belə cavab verdi: “Real güc məsələsinə mənim münasibətim bir az fərqlidir. Hamımız bilirik ki, Azərbaycanda müxalifətin resursları kifayət qədər məhduddur. Müxalifət ancaq ideoloji prinsiplərin gücündən danışa bilər. Bu hakimiyyətlə mübarizədə daha sabit və prinsipial mövqe nümayiş etdirən, hakimiyyətin dəyişməsini istəyən narazı qüvvələrin maraqlarını ifadə edən təşkilatların gücündən danışmağın yeri var. Ən azı siyasətlə məşğul olanlar bilir ki, siyasi təşkilatların gücü nə 90-ci ildəki gücdür, nə də 2000-nin əvvəlində olan güc. Bu gün müxalifətin resursları kifayət qədər zəifləyib”.

Ə.Əliyev cəmiyyətdə narazılığın olduğunu da qeyd etdi: “Əsas məsələ narazı qüvvələrlə siyasi təşkilatların uzaq məsafədə dayanmasıdır. Yaxınlaşma o zaman baş verir ki, cəmiyyət siyasi partiyaların real fəaliyyətini görsün. Müsavat Partiyasının son illər etdikləri, Azərbaycanın milli maraqlarını qurban verməsi, bütün siyasətini partiya maraqlarının üzərində qurması və bir neçə şəxsin həyat tərzinin yaxşılaşdırılmasına olunan xidmət bu partiyanın hədəfini məlum edir. Belə partiyalarla yaradılan birlik heç vaxt güc mənbəyi ola bilməz. Sadəcə özlərini cəmiyyətə həlledici qüvvə kimi təqdim etməyə çalışırlar. Azərbaycan müxalifəti bir piket keçirməyə çətinlik çəkirsə, əhali aksiyalara dəstək vermirsə, bu haqda ciddi düşünmək lazımdır. Müxalifətin gücünü mərkəzləşdirmək və narazı elektoratı formalaşdırmaq əvəzinə müxalifət düşərgəsində iqtidar olmaq cəhdi Azərbaycan siyasətini və demokratik qüvvələrini məğlubiyyətə gətirən amildir”.

Müsavat Partiyası öz gücündən danışırsa, necə olur ki, Azərbaycanda heç bir müxalifət partiyasına dövlət tərəfindən qərargah verilməyib? Necə olur ki, hakimiyyət Müsavat Partiyası üçün şərait yaradır, ALP, VİP və AXCP qərargahsız qaldığı halda Müsavat hakimiyyətin ona verdiyi qərargahda fəaliyyət göstərir? – Ə.Əliyev əlavə etdi: “Necə olur ki, bu partiyaya yaxın qəzet Azərbaycanda siyasəti istiqamətləndirən şəxsi aşıq şəkildə təbliğ edir? Necə olur ki, Müsavat 2005-ci ildən hakimiyyəti xilas edir və sonra da öz gücündən danışır? Bunlar hamısı cavabı bilinməyən suallardır. Bu xidmətlərin əvəzində Müsavat parlamentdə yer, qərargah və digər imtiyazlar qazanıb. Bunlar Azərbaycan siyasətinin görünməyən tərəfidir. Biz gələcəkdə belə pərdəarxası məsələləri cəmiyyətə çatdırmağa çalışacağıq”.

Əli Mövlud