Dövlət Statistika Komitəsinin ölkədə yeni doğulan körpələr və ölkədə ən çox qoyulan adlar haqqında növbəti məlumatları yayılıb. ANS PRESS-in məlumatına görə ötən il doğulmuş 152,1 min körpənin 46 faizini qızlar təşkil edib. Dövlət Statistika Komitəsindən Milli.Az-a verilən məlumata görə, qadınların 59,4 faizi nəsilvermə qabiliyyətinə malikdir və onların hər biri orta hesabla dünyaya 2 uşaq gətirib.
Qız uşaqlarına verilmiş adlar içərisində ən çox “Fatimə” adına təsadüf olunur. Bundan sonra şəhər yerlərində daha çox verilən ad “Fidan”, kənd yerlərində isə “Nərmin” olub. Zəhra, Nuray, Nəzrin, Leyla da geniş yayılmış adlardandır.
Hazırda ölkədə 31 doğum evi, 321 qadın məsləhətxanası, 592 uşaq poliklinikası və ambulatoriyası, 1735 feldşer-mama məntəqəsi fəaliyyət göstərir. Bu gün qadınlar arasında gözlənilən ömür uzunluğu kişilər arasında gözlənilən ömür uzunluğundan 5,2 yaş yüksəkdir və 76,1 yaş təşkil edir.

Ölkənin ictimai-siyasi, iqtisadi, mədəni həyatında fəal iştirak edən Azərbaycan qadınlarının məşğul əhalinin ümumi sayındakı xüsusi çəkisi 48,7 faiz təşkil edir. Ümumi təhsil müəssisələrində müəllimlərin 74 faizi, orta ixtisas təhsil müəssisələrində 73 faizi, ali təhsil müəssisələrində 47 faizi, həkimlərin 62 faizi qadınlardır. Ümumi təhsil müəssisələri şagirdlərinin 47 faizi, orta ixtisas təhsil müəssisələrində oxuyanların 67 faizi, ali təhsil müəssisələrinin tələbələrinin 46 faizi qızlardır.

Dövlət Statistika Komitəsi tərəfindən keçirilmiş müayinənin nəticələrinə görə, ötən il 25-64 yaşında olan qadınların 84 faizi fasiləsiz təhsildə, o cümlədən 0,2 faizi formal, 14 faizi qeyri-formal, 69,8 faizi informal təhsildə iştirak edib. Elmin inkişafında da qadınların müstəsna rolu var. Hazırda doktorantların 40 faizini, bütün elmi işçilərin isə 50 faizini qadınlar təşkil edir. Son 5 ildə elmlər doktoru dərəcəsi olan qadınların sayı 33 faiz, elmlər namizədi dərəcəsi olan qadınların sayı isə 17 faiz artıb. Azərbaycan Milli Elmlər Akademiyasının müxbir üzvlərindən 12-si, akademiklərdən 3-ü qadındır. Milli Məclisdə qadın millət vəkillərinin xüsusi çəkisi də artır. Əgər 1990-cı ildə bütün deputatların 4,3 faizini qadınlar təşkil edirdisə, bu gün ölkə parlamentində qadınların xüsusi çəkisi 11,2 faizdir.
Son bələdiyyə seçkisində bələdiyyə üzvü seçilmiş qadınların sayı əvvəlki seçkilərə nisbətən 4,9 dəfə artaraq 4081 nəfərə çatıb və bələdiyyə üzvləri arasında onların xüsusi çəkisi 26,2 faiz olub.
Xatırladaq ki, bir qədər əvvəl Statistika komitəsinin demoqrafiya şöbəsinin müdiri Rza Allahverdiyev Day.az-a açıqlamasında mövzu ilə bağlı bildirmişdir: "2009-cu ildə dünyaya gəlmiş körpələrə verilmiş adlar sırasında qız uşaqlarına ən çox Fatimə, Pərvanə, Aysel, Aytac adları qoyulmuşdur. Oğlanlar arasında ən çox qoyulan ad isə Əli, Hüseyn, Mühəmməd və Fəriddir."
Ötən ilin may ayında Dövlət Statistika Komitəsindən Lent.az-a verilən məlumata görə, ötən il doğulan uşaqlar üçün gözlənilən ömür uzunluğu 72,6 yaş (oğlanlarda 69,9, qızlarda isə 75,4 yaş) təşkil edir. Həmin dövrə doğulan uşaqlara ən çox qoyulan oğlan adları Muhəmməd, Əli, Hüseyn, Murad və Nihad, qız adları isə Fatimə, Zəhra, Nərmin və Nuraydır.
Hazırda bu ilin mart ayının əvvəlinə ölkə əhalisinin ümumi sayının 50,9 faizini və ya 4 milyon 592 min nəfərini qadınlar təşkil edir.