Artıq bir həftədən çoxdur ki, 8 Mart - Beynəlxalq Qadınlar Günü ilə bağlı mətbuatda müxtəlif yazılar gedir. Ötən gün qəzetimizin planlaşmasında da əsas mövzulardan biri elə bu idi. Planlaşmada məlum oldu ki, sözü gedən bayramla əlaqədar qəzetimizin redaktorlarından biri artıq nazirə 60 manat “göndərib”. Digər redaktorumuz isə 20 manat. Həmkarlarımız bu halı tənqid etsələr də hədiyyəsiz keçinməyin mümkün olmadığını etiraf edirlər: “Elə bir iyrənc psixoloji atmosfer yaradılıb ki, bu kompaniyadan kənarda qalmaq olmur”.

Ötən gün isə təhsil naziri Misir Mərdanov hər il olduğu növbəti sərt bəyanatla çıxış edib. Deyib ki, 8 martla əlaqədar Azərbaycanda hansısa məktəbdə direktor tərəfindən pul yığılması faktı aşkarlanarsa, həmin direktor vəzifəsindən azad olunacaq. Nazirin sözlərinə görə, artıq onlara bəzi məktəblərdən bununla bağlı müəyyən məlumatlar daxil olur: “Müxtəlif adlar altında şagirdlərdən pul yığılmasını qanunsuz hesab edirik. Mətbuatı da bununla bağlı gündəlik izləyirik. Məktəb direktoru bu işlərlə məşğul olarsa, belə hallar aşkarlanarsa, onlar vəzifədən azad olunacaq və müxtəlif intizam tədbirləri görüləcək. Heç kəsin belə bir addım atmağa ixtiyarı yoxdur, xüsusilə də müəllimlərin”.
Nazir ötən il “Müəllimlər günü” ərəfəsində də belə faktlar aşkarlandığını və bu işlə məşğul olan şəxslər barəsində müvafiq tədbirlər görüldüyünü açıqlayıb. Biz də bu məqsədlə məktəblərdə monitorinq aparıb nazirin bəyanatına əməl olunub-olunmaması ilə maraqlandıq.
İlk getdiyimiz ünvan 258 saylı orta məktəb oldu. Qarşımıza çıxan şagirdlərdən 8 martda müəllimlərini necə təbrik edəcəklərini soruşduq. Şagirdlər isə hələ bu barədə bir qərara gəlmədiklərini dedilər: “Bizim məktəbdə bir qəpik də pul yığılmır. Məktəbimizin direktoru Sədaqət xanım sinifləri bir-bir gəzib pul yığımı ilə bağlı müəllimləri və valideynləri xəbərdar edib. O dedi ki, hansı müəllim pul yığsa müəllimlə yanaşı valideyn də cəzalandırılacaq”. Bu cavab bizim üçün inandırıcı olmadığı üçün digər şagirdlərə də eyni sualı verdik. Onlardan da eyni cavabı aldıq. Nə deyirik ki, təki belə olsun.
36 saylı orta məktəbdə isə şagirdlər 30 manatdan yığırlar. Bunu bizimlə söhbət zamanı şagirdlər dedilər: “Sinif rəhbərimiz deyib ki, hərə 30 manatdan pul gətirsin. Demək olar ki, sinifdə uşaqların 90 faizi pulları gətirib. Müəlliməmiz deyir ki, yığılan pulların cəmi 30 faizi ona çatacaq. Qalanı isə direktorla müəllimlər arasında bölüşdürüləcək”.
57 saylı orta məktəbin 2-ci sinif şagirdlərinin valideynləri isə 20 manatdan pul yığıldığını dedilər: “Müəllimlər deyib ki, bizə hədiyə almaqdansa pulunu versəniz daha yaxşı olar. Biz də pulu verəcəyik”.
7 saylı orta məktəbin şagirdləri isə sinif rəhbəri üçün 50 manatdan pul yığıldığını dedi: “Sinif rəhbərimiz deyib ki, yığılan 50 manat 2-3 yerə bölünəcək. Pulun demək olar ki, yarı hissəsi direktora çatacaq. Biz pul yığsaq da hər il sinif rəhbərimizə və bəzi müəllimlərimizə buket bağlatdırırıq”.
62 saylı orta məktəbdə də şagirdlərdən pul yığılır. 10-cu sinif şagirdlərinin sözlərinə görə, 8 martla bağlı onlardan 50 manat pul yığılır: “Bizdə nə qədər pul yığılmasını sinif rəhbəri özü təyin edir. Yuxarı sinif olduğumuz üçün 50 manatdan gətirməyimizi tələb edib. Hələ çox adam verməyib. Vaxta var, yəqin ki, uşaqların hamısı gətirər”.
214 saylı orta məktəbin 8-ci sinif şagirdləri isə 20 manatdan yığdıqlarını dedilər: “20 manatdan yığırıq. Amma müəlliməmiz deyib ki, hədiyyə almaq lazım deyil, pulu verərsiniz”.
Eyni məktəbdə oxuyan 7-ci sinif qızları isə pul yığmadıqlarını dedilər: “Bizim sinif oğlanları özləri pul yığırlar. Valideynlər iclasında belə qərara gəlindi ki, qızlardan pul yığılmasın. Onlar həm müəllimlər üçün, həm də bizim üçün pul yığır. Nə qədərdən yığdıqlarını isə bizə açıqlamırlar ”.
Sözügedən məktəbin həyətində bir neçə valideynin yığışıb nə isə müzakirə apardığını görüb, onlara yaxınlaşdım. Valideynlər 8 mart münasibətilə yığılan pulları müzakirə edirdilər. Onlardan biri əsəbi halda - “müəllimlərin hər istədiyini gətirib verəsi deyilik ki, ”- deyirdi. Digəri isə - “Dünən Misir Mərdanov eşitmədiniz televizorda nə dedi. ”Qaynar xətt" açılıb. Bu dəqiqə ora zəng eləsəm müəllimi də, direktoru da işdən atarlar bayıra. Amma bundan sonra övladımın harada təhsil alacağı sual altında qalacaq". Valideynlərin fotolarını çəkəndə isə onlar öz kəskin etirazlarını bildirdilər. Xanımlardan biri şəkili dərhal silməyimizi tələb edir: “Mənim yoldaşım dövlət işində işləyən adamdır. Hər gün də ”Yeni Müsavat" qəzeti stolunun üstündə olur. Mənim şəkilim qəzetdə çıxsa sonra onu da incidəcəklər".
Beləcə reportajımızdan da göründüyü kimi nazirin bəyanatına baxmayaraq məktəblərdə 8 marta qızğın hazırlıq gedir.Musavat