Məmurlar içərisində ən fağırı kimi tanınan ekologiya və təbii sərvətlər naziri Hüseyn Bağırovun da səsi çıxdı. Zirvələr fəth etməkdən yorulmayan nazirin bu dəfə kəllə-kəlləyə gəldiyi dağı fəth edə biləcəyi ciddi sual altındadır. Çünki bu “dağ”ın adı Bəylər Əyyubovdur. Ekologiya naziri ilə Prezidentin Şəxsi Mühafizə Xidmətinin rəisi Bəylər Əyyubov Şamaxı mehmanxanası üstündə dava edirlər. Bu barədə redaksiyamıza məlumat verən mənbənin sözlərinə görə, rayonun mərkəzində yerləşən mehmanxana bir neçə ay əvvələdək təmir olunurmuş: “Hazırda təmirin yarımçıq qaldığı bildirilir. Buna səbəb isə Bəylər Əyyubovla Hüseyn Bağırovun mehmanxana üstündə mübarizə aparmasıdır.
Məsələ ondadır ki, həmin mehmanxana binası Şamaxıda yeganə 9 mərtəbəli tikilidir. Əvvəl həmin mehmanxananın Hüseyn Bağırov üçün təmir olunduğu deyilirdi. Pirqulu Dövlət Qoruğunun rəhbəri Tağı Həsənov Bəylər Əyyubovun adamıdır. O, təmir prosesində mehmanxananı özəlləşdirərək hotel edib və Bəylər Əyyubova verib. Bunun üstündə də iki məmur arasında münaqişə yaranıb. Vəziyyət hətta o yerə çatıb ki, Hüseyn Bağırov Tağı Həsənovu işdən çıxarmaq istəyib. Amma işə Bəylər Əyyubov qarışıb və nəticədə ekologiya naziri hələlik arzusuna çata bilməyib”. Mənbəmiz bildirir ki, Şamaxının simvolu sayılan həmin mehmanxananın təmiri zamanı Pirqulu qoruğunun ağaclarından da istifadə olunub: “Qoruğun ən nadir ağaclarından taxta materialı kimi istifadə edilib”.
Mənbənin sözlərinə görə, Şamaxı fövqəladə hallar naziri Kəmaləddin Heydərovun kurasiyasında olan bir rayondur: “Hüseyn Bağırov da ”fövqəlnazir"in adamı hesab olunur. Ona görə də əslində bu mübarizəni fövqəladə hallar naziri ilə prezidentin şəxsi mühafizə rəisinin arasındakı mübarizə kimi qiymətləndirmək olar. Məsələ burasındadır ki, həmin mehmanxananın təmirdən sonra açılış mərasimi olmalıdır. Mərasimin dövlət başçısının rayona növbəti səfəri ərəfəsində düzənlənəcəyi bildirilir. Lakin yaranmış problem hazırda təmir işlərinin yarımçıq qalmasına, ən azı ləng getməsinə səbəb olub".
Qeyd edək ki, Bəylər Əyyubovun da Şamaxıda turizm obyektləri, iri fermer təsərrüfatları var.
***
Ümumiyyətlə isə Şamaxıda ən çox ərazinin Dövlət Neft Şirkətinin prezidenti Rövnəq Abdullayevin payına düşdüyü deyilir. Bildirilir ki, bu yaxınlarda o, Pirqulu dağının yaxınlığındakı “Cənnət bağı” adı ilə tanınan məşhur istirahət mərkəzini 1 milyon 500 min manata alıb. Şamaxıda Qafqaz Müsəlmanları İdarəsinin rəhbəri Allahşükür Paşazadənin də mülkü var. Əvvəllər bu ərazi sabiq əmək və əhalinin sosial müdafiə naziri Əli Nağıyevə məxsus olub. Ancaq o “vurulandan” sonra mülkünü şeyxə satmalı olub. Şamaxı sürücülük məktəbi isə fövqəladə hallar naziri Kəmaləddin Heydərovun sərəncamındadır. Şamaxıdakı yolkalıqda isə baş prokuror Zakir Qaralov və onun sürücüsünün villası ucalmaqdadır. Bəs Şamaxıya bu qədər maraq haradandır?
***
Şamaxı rayonu Kür-Araz ovalığının Şimal qurtaracağından başlayaraq Böyük Qafqaz sıra dağlarının cənub yamaclarına qədər uzanır. Ərazidə hündürlük 300-2100 m. (Gülümdostu zirvəsi) arasında dəyişir. Belə dəyişiklik isə olduqca rəngarəng təbii şəraitin yaranmasına səbəb olur. Dəniz səviyyəsindən hündürlüyün artması ilə iqlimi mülayim, yağıntıları təxminən bərabər paylanan, yayı nisbətən qısa və sərin, qışı isə uzun müddətli və bol qar örtüklü dağ-meşə iqlimi ilə əvəz olunur. Rayonun olduqca maraqlı iqlimi var. Cənub ərazisində (Hacıqədirli kəndi) bəzi illərdə qar örtüyü müşahidə edilməsə də, dağlıq ərazisində illik qar örtüyü 219 mm.-ə çatır. Bəzən oktyabr ayının son günlərində yaranan qar örtüyü may ayının ortalarına qədər davam edir. Bu isə turizmin və idmanın qış növləri üçün olduqca əlverişli şərait olduğundan xəbər verir. Şamaxının iqlim şəraiti və rayonun relyefi çoxlu ecazkar təbiət guşələri yaradıb. Dədəgünəş, Avaxıl, Qaladərəsi, Keçmədin, Sis, Nağaraxana, Qonaqkənd, Meysəri, Mədrəsə, Qızmeydan, Pirbəhli və s. kəndlərdə əsrarəngiz gözəlliyə malik olan ərazilər çoxdur. Bu ərazilər ilin bütün vaxtlarında xüsusilə yayda yaxın və uzaq rayonlarından minlərlə adamı özünə cəlb edir.
Yəqin ki, əlavə şərhə ehtiyac yoxdur, məmurlarımızın Şamaxıya nədən xüsusi önəm verməsi rayon haqda bu qısa arayışdan sonra aydın olur.
Bəyim/Yeni Müsavat
