Ölkənin səhiyyə sistemində keçirilən müayinələr zamanı heyrətamiz faktlar ortaya çıxıb. Redaksiyamıza daxil olan məlumata görə, bəzi xəstəxanalarda aparılan müayinələr nəticəsində bir sıra həkimlərdə ciddi yoluxucu xəstəliklərin olması aşkarlanıb. Mənbəmizin bildirdiyinə görə, anestezioloq, cərrah və stomatoloq kimi çalışan həkimlərdə kəskin virus xəstəliklərdən sayılan hepatit C və hepatit B üzə çıxıb. Lakin bu həkimlər nəinki görəvindən uzaqlaşdırılmayıb, faktlar hətta ört-basdır edilib. Qaynağın iddiasına görə, səlahiyyət sahibləri ya öz maraqları naminə ortaya çıxmış nəticələrə göz yumublar.

Mövzu ilə bağlı aldığımız digər məlumat isə daha heyrətamizdir. Məlumata görə, həkimlərdən birində hepatit B virusu aşkarlandığı üçün ona işdən çıxmaq barədə ərizə yazmaq tövsiyə edilsə də, o, hansısa vasitələrlə, qanını “təmiz” çıxartdırıb. Qeyd edək ki, mənbəmiz xəbərin yüzdə-yüz doğru olduğunu bildirsə də, ad çəkməyə və xəstəxanaları konkretləşdirməyə ehtiyatlandı.
Məsələ ilə bağlı müraciət etdiyimiz Səhiyyə Nazirliyi mətbuat xidmətinin rəhbəri Anaq Qədirli təqribən yarım saatlıq araşdırmadan sonra məlumatı təkzib etdi. Bununla belə, o, səhiyyə sistemində çalışanların vaxtaşırı müayinə olunduğunu söylədi: “Tibb işçilərinin qrafikə uyğun müayinədən keçmə vaxtları var. Onlar 6 ay, yaxud bir ildən bir müayinədən keçirlər. Lakin bizdə hansısa həkimdə hepatit C, yaxud hepatit B aşkarlandığı haqda məlumat yoxdur”.
A.Qədirliyə görə, hepatitlərin ağır və ya yüngül forması olduğu üçün məsələyə birmənalı yanaşmaq olmaz: “Daşıyıcıdırlarsa, həmin şəxslərin həkim işləyib-işləməməsinin heç bir əhəmiyyəti yoxdur. Ancaq deyək ki, hepatit aktiv formadadırsa, o adam cərrah işləyə bilməz. Burda xəstəliyin qanla keçmə məsələsi var. Olur ki, cərrah əməliyyat zamanı öz barmağını da kəsə bilir”. Nazirlik sözçüsü bununla belə, əlavə etdi ki, məsələ daim nəzarətdə olacaq.
Tibb elmləri doktoru, cərrah Adil Qeybulla bizimlə söhbətdə hepatit və immunodefisit viruslarının qanla keçdiyini bildirdi: “Bu zaman qanla kontaktların olmasından qaçmaq lazımdır. Xüsusilə də cərrahlar, ginekoloqlar maksimum ehtiyatlı olmalıdırlar. Onlar həm yoluxmaq, həm də yoluxdurmaq imkanlarına malikdir. Bu zaman daha çox yoluxmaq imkanı var, nəinki yoluxdurmaq. Əməliyyat vaxtı bir iynə barmağa batırsa, təbii ki, virusa yoluxma təhlükəsi yaranır. Amma hazırda cərrahların böyük əksəriyyəti bir çox hepatit viruslarına qarşı peyvənd edilib. C virusunun vaksini hələlik mövcud deyil. Bundan başqa, xəstələrin böyük əksəriyyəti əməliyyat öncəsi viruslarla bağlı yoxlanılır. Əgər virus aşkarlanırsa, müvafiq tədbirlər görülür. Təsəvvür edin, SPİD-li və ya hepatit viruslu xəstənin cərrahi əməliyyata ehtiyacı varsa, onu nə etmək lazımdır? Bu zaman cərrah üçün müəyyən risk qalır”.
Professora görə, bu səbəbdən xaricdə hepatit əleyhinə iynənin deşməsi mümkün olmayan xüsusi əlcəklərdən istifadə olunur. Amma o əlcəklər çox bahalı olduğundan, əldə edilməsi xeyli xərclər tələb edir: “Belə əlcəklərdən bir ara yalnız Mərkəzi Klinik Xəstəxanada istifadə edirdilər. Amma digər klinikalarda görməmişəm. Bundan başqa, hepatitli xəstələrdə istifadə olunan xüsusi sarğı materialı, cərrahi alətlər əməliyyatdan qabaq xüsusi məhlullarda dezinfeksiya olunmalıdır”.
Hepatitli həkimlərin işdən kənarlaşdırılması məsələsinə gəldikdə, A.Qeybulla dedi ki, bunun üçün heç bir hüquqi əsas yoxdur: “Qanun bunu yasaq edir. Hepatitli həkimin işdən çıxarılması qanun pozuntusudur. Hepatitli şəxs anonim müayinə edilə bilər. Necə ki, hepatitli xəstənin əməliyyat olunmaq hüququ var, cərrahın da əməliyyat etmək haqqı var. Mən işdən azad olunma faktı barədə eşitməmişəm. Amma bu cür yoxlamalarda hepatitli həkimlərin aşkar olunması mümkündür”.
Əlavə edək ki, məlumatlı mənbə xəbərin doğruluğunda israr edib. Araşdırmalarımız davam edəcək.

M.HÜSEYNLİ/Yeni Müsavat