Heydər Əliyev Sarayının arxasında Füzuli və Şəmsi Bədəlbəyli küçələrinin kəsişməsindəki binaların sakinlərinin başı dərddədir. Çünki tikilməkdə olan “Qış bulvarı” onları evsiz-eşiksiz qoyub. Artıq neçə gündür ki, bu küçələrin sakinləri evlərindən zorla çıxarılır, ərazidəki obyektlər isə sökülür. Sakinlər isə Bakı meriyası tərəfindən aldadıldıqlarını iddia edir. “Qış parkı”nın tikintisi ilə bağlı ölkə başçısı sərəncam imzalayıb. Özü də bir neçə dəfə gəlib burada aparılan işlərlə maraqlanıb. Hələ onda Hacıbala Abutalıbov demişdi ki, dövlət tərəfindən ayrılan kompensasiyalar sakinlərə veriləcək. Biz də bilirik ki, dövlət evimizi başımıza uçurtmağa görə mənzilimizin hər kvadratına 4 min manat pul ayırıb. İndi bizə kvadrata görə verdikləri 1500 manatdır. Belə çıxır ki, büdcədən ayrılan vəsaitin üçdə biri sakinlərə verilir".

Bunu bizə ərazidə olarkən Basin (indiki Füzuli) küçəsinin sakinlərindən biri söylədi. Bəziləri isə, daha dəqiq desək, Ş.Bədəlbəyli küçəsində yaşayan Firudin Ələkbərov hesab edir ki, söhbət maxinasiyadan gedir: “Abutalıbov prezident tərəfindən ayrılan vəsaiti basıb yeyib. Çünki keçən ilin sonuna kimi parkı tikib təhvil verməyi planlaşdırmışdılar. Sonradan tikməyə şirkət axtardılar. Bir müddət də bunu bəhanə elədilər. Axırda da sakinlərə verilən kompensasiyadan ortaya çıxdı ki, büdcədən ayrılan milyonları Bakı meriyası mənimsəyib. Gecənin bir vaxtı polis gücü ilə camaatı çölə atdılar ki, səs-küy çıxmasın. Bu qanunsuzluqla bağlı ölkə başçısı İlham Əliyevə, daxili işlər naziri Ramil Usubova, baş prokuror Zakir Qaralova müraciət edəcəyik”.
“Vətəndaşların mənzil toxunulmazlığı kobudcasına pozulur. Oxşar situasiyanı yerlə-yeksan edilən tarixi binanın sakinləri də yaşamışdı. Onlara da dövlət tərəfindən ayrılan kompensasiyanın yarısından da az hissəsini təklif edirdilər. ”Qış bulvarı"nın tikintisi ilə bağlı ölkə başçısı büdcədən vəsait ayrılmasına dair sərəncam imzalayıb. Əgər Bakı meriyası ayrılan kompensasiyanı mənimsəyirsə, vətəndaşları incidirsə, bu, o deməkdir ki, Abutalıbov prezident sərəncamını heçə sayır".
Bu sözləri isə mövzu ilə bağlı danışdığımız hüquq müdafiəçisi Azad İsgəndərli söylədi. O qeyd etdi ki, narazı sakinlər tərəfindən müraciətlər olsa, onların hüquqlarını müdafiə etməyə hazırdır.
Məsələ ilə bağlı Bakı Şəhər İcra Hakimiyyəti ilə əlaqə saxlayıb əhalini narazı salan kompensasiya məsələsinə aydınlıq gətirməyə çalışsaq da çoxsaylı zənglərimizə cavab verən olmadı. Meriyanın mətbuat xidmətinin əməkdaşı Nailə Məmmədova isə “Bizim Yol” qəzetinə bildirib ki, köçürülən sakinlərin narazılığı barədə məlumatsızdır və bu barədə söz deyə bilməz. N.Məmmədova deyib ki, hələ bir müddət əvvəl bu sakinlərin nümayəndələri ANS-ə çıxaraq mövzu ilə bağlı fikirlərini açıqlayıb: “Sakinlərə də xəbərdarlıq edilib ki, evlərini boşaltsınlar. Evlərindən çıxmayanların günahı özündədir”.
Ayrılan kompensasiyanın mənimsənilməsi barədə iddialara gəlincə isə N.Məmmədova bu barədə bir söz deməyib: “İnsanlara nə qədər pul veriləcək, bunun üçün büdcədən nə qədər maliyyə ayrılıb kimi məsələlərlə bağlı şöbəmizdə məlumat yoxdur. Maliyyə işlərinə mən baxmıram. Bizim şöbəyə nə məlumat verirlərsə, onu da jurnalistlərə çatdırıram”.
Əlavə edək ki, ərazidə park salmaq ideyası hələ sovet dövründə yaranıb. Prezidentin Bakının abadlaşdırılması ilə bağlı 2006-cı ildə imzaladığı sərəncam isə bu ideyanın reallaşmasına imkan yaradıb./Fərahim/Yeni Müsavat