Dünyanın bəzi ölkələrində qeyri sabit hava şəraiti təbii fəlakətlərə səbəb olub. Leysan yağışları və torpaq sürüşmələri nəticəsində həlak olanlar var. Rumıniyada güclü qar nəticəsində bir çox yaşayış məntəqələri işıqsız qalıb. Yolların buz bağlaması səbəbindən ölkənin 150-dən çox magistral yolu bağlanıb. Xilasedicilər yollarda qalan 70 nəfəri xilas edib. Qatarların hərəkəti də dayandırılıb. Yaponiyada da güclü qar ölkənin şimal ərazilərində həyatı iflic edib. Qarın hündürlüyü bəzi bəzi şəhərlərdə 3 metrə çatıb. Meteoroloqlar son 26 ildə Yaponiyaya belə qarın yağmadığını bildirirlər. Niigata şəhərində yollarda qalan yüzlərlə insan xilas edilib. Xizəkçilik mərkəzinin yerləşdiyi Şiqakoendə isə qar uçqunundan turistlərin olduğu avtobusa ziyan dəyib. Nəticədə 2 turist xəsarət alıb. Güclü qar Birləşmiş Ştatları da cənginə alıb. Ölkənin şərq hissələrində hökm sürən kəskin hava şəraiti əsasən Kolumbiya, Merilənd və Pensilvaniya ştatlarında vəziyyəti daha da çətinləşdirib. Bu ştatlarda 1 milyon 500 mindən çox insan işıqsız qalıb. Bəzi ərazilərdə qarın hündürlüyü 90 santimetrə çatıb. Qeyri-sabit hava şəraiti səbəbindən paytaxt Vaşinqtonda da hava limanı tamamilə bağlanıb. Bir çox yollarda hətta ictimai nəqliyyatın hərəkəti məhdudlaşdırılıb. Hökümət mövcüd vəziyyətlə əlaqədər fevralın 8-ni Vaşinqtonda qeyri iş günü elan edib. Peru isə son 15 ilin ən güclü yağışlarından əziyyət çəkir. Kusko bölgəsində son bir həftə ərzində ikinci dəfə baş verən daşqınlar nəticəsində 70 ev dağılıb. Bundan başqa, xəstəxana və hökümət idarələrinə, həmçinin kilsə binasına da ciddi ziyan dəyib. Küçələrin palçıqdan təmizlənməsinə ağır texnika cəlb olunub. Hökumət təbii fəlakətdən əziyyət çəkən sakinlərə yardım ediləcəyini açıqlayıb. Leysan Boliviyanın qərbində yerləşən 4 əyalətdə 12 insanın ölümünə səbəb olub. Baş verən daşqınlar əkin sahələrinə ciddi ziyan vurub. Beni əyalətində İbare çayının məcrasından çıxması səbəbindən bölgədə yaşayan 28 min ailə ciddi təhlükəylə üzləşib. Bölgədə fövqəladə vəziyyət elan edilib. Meksikanın Çinakantepek ərazisində isə 3 gün davam edən aramsız yağışlar nəticəsində torpaq sürüşməsi baş verib. Təbii fəlakət nəticəsində çox sayda insanın həlak olduğu bildirilir. Xilasedicilər artıq 11 nəfərin cəsədinı palçıqdan çıxarıb. Digər qurbanların axtarışları isə davam edir. Fəlakət nəticəsində 10 avtomobilin torpaq altında qaldığı bildirilir.