Sahil Atayev əsgərləri döyüb, belində gəzib, pullarını mənimsəyib, cavab qaytaranı isə güllələyib

Ağır Cinayətlərə Dair İşlər üzrə Hərbi Məhkəmədə Müdafiə Nazirliyinin “N” saylı hərbi hissəsinin hərbi qulluqçusu, gizir Sahil Cahangir oğlu Atayevin məhkəməsi başa çatıb. Hökmə əsasən Atayev hərbi xidmət üzrə vəzifələrin yerinə yetirilməsi ilə əlaqədar öz tabeliyində olan əsgərləri təhqir eedib, döyüb və işgəncə verib.
Belə ki, Atayev 20 iyul 2006-cı il tarixdən “N” saylı hərbi hissəsində Gədəbəy rayonunun Göyəmli kəndi post başçısı kimi xidmət edib. O, 2008-ci ilin oktyabrın 4-də saat 7 radələrində “qalx” komandasından sonra sığınacaqda yatdığı üçün tabeliyində olan əsgər Bağırov Seymur Yusif oğluna vurmaqla onu təhqir edib.
Bundan başqa, o, oktyabrın 12-də saat 10 radələrində çırpı gətirməyə getmədiyi üçün tabeliyində olan əsgər Həsənov Nəvai İsrayıl oğlunu da təhqir edib və döyüb. Rəşad Xəlilovu, Ricay Ağayevi, Xəyyam Kərimovu, Nicat Aslanovu təhqir edərək, onlara işgəncə verib. Həbs edilən gizir eyni zamanda əsgərləri yerə yıxaraq, onların bellərinin üstündə gəzib, onlara dəhşətli işgənclər verib. O, düşmənlə üzbəüz səngəri təmizləyən əsgərləri qırmancla kürək və ayaqlarından vururmuş.
O, müntəzəm olaraq tabeliyində olan əsgərlərin əməkhaqlarını alaraq, mənimsəyib. Gizir, “işıq mühərrikinə benzin almaq adı“ ilə həmin pulları yığdığını bildirib. Atayevin əsgərlərdən danışıq kartlarının alınması barədə də ittiham aktında qeyd edilib.
O, 2008-ci il oktyabrın 18-də tabelyində olan əsgər Həsən Allahverdiyevi söyərkən, sonuncu ona eyni söyüşlərlə cavab verib. Allahverdiyevin söyüş söyməsindən əsəbləşən Atayev atəş açaraq, onun qarın nahiyyəsindən vurub. Allahverdiyevə vaxtında tibbi yardım göstərildiyindən onun həyatını xilas etmək mümkün olub.
Məhkəmənin hökmü ilə Sahil Atayev 9 il müddətinə azadlıqdan məhrum edilib.