Naxçıvan Ali Məclisinin sədri Vasif Talıbovu son günlər mükafat yağışına tutublar. Muxtar Respublikada insanların hüquqlarını heç bir sərhəd tanımadan pozan V.Talıbov bir neçə gün əvvəl prezident Ilham Əliyev tərəfindən “Şöhrət” ordeni ilə təltif olunmuşdu. Dünən isə Naxçıvan Mətbuat Şurası V.Talıbova “Mətbuatın dostu” fəxri adının diplomunu təqdim edib. Halbuki Naxçıvan Azərbaycanda söz azadlığının ən çox pozulduğu, jurnalistlərin təzyiqlərə məruz qaldığı region kimi tanınır. Beynəlxalq təşkilatlar Azərbaycanda söz azadlığının pozulmasına dair hesabatlarında Naxçıvanın adını xüsusi vurğulayırlar.

Naxçıvan Mətbuat Şurası Ali Məclis sədrinə mükafat verilməsini belə əsaslandırıb: “Naxçıvan Muxtar Respublikasında dövlət mətbuat orqanlarının maddi-texniki vəziyyətini yaxşılaşdırmaq tədbirləri haqqında” 2000-ci il 29 mart tarixli sərəncamı KIV-in inkişafı sahəsində əsaslı dönüş yaradıb. “Şərq qapısı”, şəhər və rayon qəzetlərinin maddi-texniki bazası yaxşılaşdırılıb. Redaksiyaların əsaslı təmir olunmuş və ya yeni tikilmiş binalarda yerləşdirilməsi, onlara kompüter dəstlərinin hədiyyə edilməsi, illik kağız ehtiyatının yaradılması, lazımi texniki avadanlıqla təchiz edilməsi, “Şərq qapısı” qəzetinin gündəlik, şəhər və rayon qəzetlərinin isə həftədə bir dəfə çap olunması, “Əcəmi” Nəşriyyat-Poliqrafiya Birliyinin və “Şərq qapısı” qəzetinin redaksiyası üçün müasir tələblərə cavab verən redaksiya-nəşriyyat kompleksinin yaradılması regionda mətbuatın inkişafına göstərilən qayğının parlaq ifadəsidir”.
Diplomu Şuranın sədri Fərəc Fərəcov təqdim edib.
“Turan” Informasiya Agentliyinin direktoru Mehman Əliyevin sözlərinə görə, V.Talıbov Naxçıvanda həmişə söz azadlığını boğub, mətbuatı təqib edib. Belə bir siyasəti həyata keçirən adamın jurnalistlərin dostu olması mümkün deyil: “Naxçıvanda Mətbuat Şurası nə işlə məşğul olur bilmirəm. Əgər bu qurum Naxçıvanda azad mətbuatın inkişafı ilə məşğul deyilsə, medianı dəstəkləmirsə, onun problemləri ilə yaşamırsa, bu necə Mətbuat Şurasıdır?”.
M.Əliyevin fikrincə, V.Talıbova verilən mükafatları mərkəzi hakimiyyətin Naxçıvanda həyata keçirilən siyasətə dəstəyi kimi qiymətləndirmək lazımdır.
“Yeni Nəsil” Jurnalistlər Birliyinin sədri Arif Əliyev hesab edir ki, Naxçıvanda baş verənlərin fonunda burada təəccüblü heç nə yoxdur. A.Əliyev onu da qeyd edir ki, Mətbuat Şurasının mükafatlar təsis edib kimisə dost və ya düşmən elan etməsi təcrübəsi Azərbaycandan başqa dünyanın heç bir ölkəsində yoxdur: “Görünür, Naxçıvanda Mətbuat Şurası haqqında təsəvvürlər nəinki bəsitdir, tamamilə yanlışdır. Mətbuat Şurasının vəzifəsi mediadan olan şikayətlərin tənzimlənməsi, medianın vətəndaşlarla hakimiyyət arasında əlaqə sistemində iştirakdır. Şuranın hansısa mükafat təsis etməsi təcrübəsi onu göstərir ki, bu qurumun funksiyalarını anlamırlar”.
A.Əliyevin sözlərinə görə, Naxçıvandakı Mətbuat Şurası faktiki olaraq dövlət orqanıdır və o, medianın yox, yerli hakimiyyətin maraqlarına xidmət edir: “Indiyə qədər biz bu qurumun media ilə bağlı hansısa ədalətli qərarını eşitməmişik. Media sahəsində olan bir şəxs kimi mən belə bir qərarın şahidi olmamışam. Mətbuat Şuraları müstəqil medianın güclü olduğu yerlərdə yaranır. Naxçıvanda hansı müstəqil mediadan söhbət gedir ki, orada hələ bir Mətbuat Şurası da fəaliyyət göstərsin”.// "Azadlıq" qəzeti