Xəbər Lenti

Sorğu

İnfografika

Arxiv

Yazar

06 Mart

2017
14:43
1389
`Narkotikdən gələn gəliri əldən vermək istəmirlər` - Millət vəkili

Xəbər verdiyimiz kimi, ötən həftə Ali Məhkəmənin Cinayət Kollegiyasının sədri Şahin Yusifovun polislərin plan doldurmaqla məşğul olduğunu deməsi ictimaiyyət arasında marağa səbəb olub.

Kollegiya sədrinin açıqlaması bir qədər gözlənilməz olsa da, sosial şəbəkə istifadəçiləri məsələnin əsaslı olduğunu vurğulayıb. Ş. Yusifov faktı onunla əsaslandırıb ki, Azərbaycanda həbs olunan hər 7 nəfərdən biri Cinayət Məcəlləsinin 234-cü (qanunsuz olaraq narkotik vasitə əldə etmə) maddəsi ilə ittiham olunur:

“Bizə məhkumlar müraciət edirlər. Onlar xahiş edirlər ki, azad olunmalarına yardım göstərilsin. Bəziləri bildirirlər ki, qanunsuz yerə məhkum olunublar. Biz də baxılmış işləri təhlil edəndə, görürük ki, polislər yenə də plan doldurmaqla məşğuldurlar. Cinayət təqibi orqanlarını başa salmalıyıq ki, belə olmaz. Narkomandırsa, narkotik dövriyyəsi ilə məşğuldursa, məsuliyyətə cəlb olunsun”.

Məsələ ilə bağlı “Qafqazinfo”ya açıqlama verən Milli Məclisin Hüquq siyasəti və dövlət quruculuğu komitəsinin üzvü, millət vəkili Tahir Kərimli bildirib ki, qeyd olunan məsələ hədsiz dərəcədə ağrılı yerimizdir və bir bəladır:

“Təsəvvür edin ki, insanlar təqib olunanda gedib meşənin içərisində vannanı asıb rəngləyərək onun da içində narkotik əkirlər. Burada 234-cü maddədə bütün sanksiyalarda həbs nəzərdə tutulur. Digər tərəfdən isə Şahin müəllim cənab prezidentin cəzanın humanistləşdirilməsi ilə bağlı öz mövqeyini doğru olaraq bildirir. İkincisi isə, hakimləri cəsarətə səsləməyi də yaxşı haldır.

Mən bu yaxınlarda Ağsu rayonunda polis orqanlarının rəhbərləri ilə söhbət edirdim. Onlar bir neçə dəstənin izinə düşüblər və həmin şəxsləri məhkum ediblər. Məhkəmə isə onlara həbslə bağlı olmayan cəza verib. Ancaq polis narazı olur ki, biz elə davranmasaq, həbs etməsək, həmin insanlar buna şirniklənəcəklər. Amma məsələyə konkret yanaşmaq lazımdır. Polisdən tələb olunur ki, ölkədə cinayətkarlığın qarşısını alsın. O biri yandan isə məhkum həbs edilməyəndə həvəslənməyə başlayır. İstənilən adam həbslə əlaqədar olmayan cəza aldıqda hər hansı cəzanı almağa hətta 10 dəfə belə razıdır. Çünki narkotikdən gələn gəliri əldən vermək istəmir”.

Millət vəkili polisin narkotik ittihamı ilə insanları həbs etməsi haqda ictimaiyyət arasında yayılmış fikrin bu məsələyə aid olmadığını vurğulayıb:

“Bu kimi fikirlər artıq polisin özünün cinayət əməlinə daxildir, o, özü şantaj edir. Polisin özünün bu cür işlərlə məşğul olması başqa cinayət tərkibli əməllərdir. Yəni hər 7 nəfərdən biri onlar deyil. Əlbəttə, polisin vəzifədən bu cür sui-istifadələri böyük narazılıq yaradır. Ancaq 234-cü maddə vətəndaşlarla bağlı maddədir. Bu məsələdə ictimaiyyətin də köməyi lazımdır. Polisləri də başa düşmək lazımdır. Çox çətin məsələdir. Əksinə, mən narazıyam ki, bu gün cinayət törədənlərin bəlkə də 10 faizi məsuliyyətə cəlb olunmur. Bu, böyük və kütləvi yayılmış xəstəlikdir. Ümumilikdə isə, respublikada narkomaniyaya qarşı mübarizə ilə bağlı böyük bir proqram qəbul olunmalıdır”.

Bölmənin digər xəbərləri


® 2009 FAKTXEBER.COM - Azərbaycan Onlayn Xəbər Portalı

Dərc olunan materialların mətninə görə, redaksiya heç bir məsuliyət daşımır.
Saytdakı materiallardan istifadə edərkən istinad zəruridir.


14-12-2017 06:36

ƏLAQƏLƏR

  (+994 70) 870-47-49      (+994 55) 786-96-84

  [email protected]


Valyuta.com


Рейтинг@Mail.ru